Web Toolbar by Wibiya
མདུན་ངོས། དྲ་རྒྱ་དང་འབྲེལ་བ། གསལ་བསྒྲགས། ནགས་ལྷ་དཔེ་ཚོགས་ཀྱི་ཆེད་རྩོམ་དེབ་ཕྲེང་དང་པོ་སྐུའི་གྱ་སྟོན་ལ་བཀའ་དྲིན་རྗེས་དྲན་གྱི་རྩོམ་བསྡུའི་གསལ་བརྡ།
 
ནགས་ལྷ་དཔེ་ཚོགས་ཀྱི་ཆེད་རྩོམ་དེབ་ཕྲེང་དང་པོ་སྐུའི་གྱ་སྟོན་ལ་བཀའ་དྲིན་རྗེས་དྲན་གྱི་རྩོམ་བསྡུའི་གསལ་བརྡ། Sunday, 03 May 2015 06:51 PDF Print E-mail

                            དྲི་མེད་ལྷག་བསམ་དཀར་པོའི་རང་མདངས་མངོན་པར་གསལ་ཞིང་ཕུལ་བྱུང་རྣམ་དཔྱོད་ཀྱི་

                                              སྟོབས་རྩལ་རབ་ཏུ་རྒྱས་པའི་རང་རིགས་རྩོམ་པ་པོ་རྣམས་ཀྱི་སྙན་ལམ་དུ།                                                                                                                                                                                                                       ཆེད་ཞུ།

    དེ་སྔོན་ང་ཚོས་ཁ་བ་གངས་ཅན་པའི་རིག་གཞུང་སྤྱི་དང་བྱེ་བྲག་ལ་ཕན་ཕྱིར་དུ་སྤེལ་བའི་ལས་རིམ་རྣམས་ལེགས་གྲུབ་བྱུང་ཡོད་ལ་ཕན་འབྲས་ཀྱང་ཆེན་པོ་བྱུང་ཡོད། དེ་ཡང་རྒྱ་ཆེའི་རྩོམ་པ་པོ་རྣམས་དང་། ལམ་སྟོན་དང་དགོངས་ཚུལ་གསུང་པའི་ཤེས་ཡོན་པ་རྣམས་དང་། ལྷག་བསམ་གྱི་གཏོང་ཕོད་ཆེ་བའི་སྦྱིན་བདག་རྣམས་དང་། ཕྱར་གྲུ་མཉམ་འདེགས་གནང་མཁན་གྱི་འབྲེལ་ཡོད་རྣམ་པ་བཅས་མདོར་ན་དངོས་ཤུགས་རྒྱུད་གསུམ་གྱི་སྒོ་ནས་ཤེས་དཔལ་ལས་གསུམ་གྱི་རྒྱབ་སྐྱོར་གནང་མཁན་རྣམས་ཀྱི་བཀའ་དྲིན་ལ་བརྟེན་ནས་བྱུང་བ་ཞིག་ཡིན། ང་ཚོས་འདས་ཟིན་པའི་ལས་རིམ་ཁག་ལ་ཕྱིར་མིག་ཅིག་བལྟས་ན་དགའ་འོས་པ་དང་སྤོབས་པ་སྐྱེ་འོས་པ་ཞིག་བྱུང་ཡོད། ད་དུང་ཡང་ང་ཚོས་གོམ་གང་མདུན་སྤོས་ཀྱི་ཚུལ་དུ་ནུས་ཤུགས་འདོན་དགོས་པ་ནི་ང་ཚོའི་ཕྲག་ཏུ་བབས་པའི་འོས་འགན་ཞིག་རེད་ལ་ཡར་རྒྱས་ཀྱི་ཕྱོགས་སུ་བགྲོད་པའི་ལམ་བུ་ཞིག་ཀྱང་ཡིན། འདི་ལོ་ནི་དུས་ཚོད་གཞན་དང་མི་འདྲ་བ་རང་ཅག་རྣམས་ཀྱི་འདྲེན་མཆོག་བླ་ན་མ་མཆིས་པ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག །འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༧གོང་ས་ལྷ་མིའི་རྣམ་འདྲེན་༧སྐྱབས་མགོན་རྒྱལ་བའི་དབང་པོ་མཆོག་དགུང་གྲངས་བརྒྱད་ཅུ་ལ་ཕེབས་པའི་དུས་ཁྱད་པར་ཅན་ཞིག་ཡིན་སྟབས་མགོན་པོ་གང་གི་གདུལ་ཞིང་ཁ་བ་གངས་ཅན་པའི་སྐྱེ་བོ་ཡོངས་ཀྱིས་སྐུའི་གྱ་སྟོན་གྱི་དུས་ཚིགས་སྲུང་བརྩི་ཞུ་དགོས་པ་ནི་དོན་དང་ལྡན་པ་ཞིག་ལོས་ཡིན། དེར་བརྟེན་ཚོགས་པ་དང་སྡེ་ཚན། ལུང་ཚན་དང་གྲོང་སྡེ་སོགས་ཀྱིས་རང་ནུས་ལ་དཔག་པའི་སྐུའི་གྱ་སྟོན་ལ་སྲུང་བརྩི་ཞུ་བའི་ལས་རིམ་སྣ་ཚོགས་ཤིག་སྤེལ་བཞིན་ཡོད་པའི་ནང་ནས་མདོ་ཁམས་ནགས་ཤོད་འབྲི་རུ་བ་རྣམས་ཀྱིས་བཀའ་དྲིན་རྗེས་དྲན་མཚོན་བྱེད་༧གོང་ས་མཆོག་གི་མཛད་རྣམ་དང་འབྲེལ་བའི་བསྟོད་ཚོགས་དང་རྣམ་ཐར་སོགས་ལས་གྲུབ་པའི་ཆེད་དེབ་ཅིག་འདོན་སྤེལ་བྱ་འཆར་ཡོད་ལགས་ན་རང་རིགས་རྩོམ་པ་པོ་རྣམས་ཀྱིས་ངེས་པར་དུ་མཉམ་ཞུགས་གནང་བར་ཞུ། དེ་ཡང་མགོན་པོ་མཆོག་གི་སྐུའི་གསང་གསུམ་གྱི་མཛད་འཕྲིན་དང་། སྐུ་གསུང་ཐུགས་ཀྱི་ཆེ་བའི་ཡོན་ཏན་རྒྱ་མཚོ་ལྟ་བུའི་མཛད་རྣམ་དང་འབྲེལ་བ། བཅད་ལྷུག་སྤེལ་གསུམ་གང་ཡང་ཡིན་ཆོག །བསྟོད་པ་དང་གསོལ་འདེབས་ལྟ་བུ་ཚིགས་བཅད་ཡིན་ན་ཤོ་ལོ་ཀ་སུམ་ཅུ་ལས་མ་ཉུང་བ་དང་། ཚིག་ལྷུག་དང་སྤེལ་མ་བཅས་ལ་ཚེག་བར་༤༠༠༠ ལས་མ་ཉུང་བ་བཅས་འདི་ལོའི་སྤྱི་ཟླ་ ༧ ཚེས་ ༡ ནང་ཚུད་ནགས་ལྷ་རྩོམ་སྒྲིག་ཁང་ལ་འབྱོར་ཐུབ་པ་གནང་རོགས་ཞུ། སླར་ཡང་ཞུ་བ། དེ་རིང་གི་རྩོམ་བརྡ་འདི་རྩོམ་ཡིག་ལ་གོམས་པ་ཆེ་བ་རྣམས་ཀྱིས་ལྷག་ཏུ་ཐུགས་འགན་བཞེས་གནང་ཡོང་བ་མཁྱེན།
                                                                                                                                      སྤྱི་ལོ་ ༢༠༡༥ ཟླ་བ་༤ ཚེས་ ༡༤ ཉིན།
                                                                                                                                                                                              ནགས་ལྷ་རྩོམ་སྒྲིག་ཁང་།
འབྲེལ་གཏུག་གློག་འཕྲིན་ཁ་བྱང་།

 རྒྱ་གར་ནང་།               This e-mail address is being protected from spambots. You need JavaScript enabled to view it                   This e-mail address is being protected from spambots. You need JavaScript enabled to view it

འཕྲིན་ཕྲན།                  འབྲི་རིང་མཐོང་། This e-mail address is being protected from spambots. You need JavaScript enabled to view it
ནགས་ཤོད་སྐལ་རྒྱན། 9880139237           ནགས་ཧ་ཧ་སྐལ་བཟང་། 860978415

རྩོམ་ཡིག་འདི་ཐེངས་ 9427 བཀླགས་འདུག