བོད་སྤྱི་མཚུངས་བཞིན་རྟ་དྲེལ་མཛོ་གཡག་ལ་བརྟེན་ནས་ཡུལ་འབྲོག་བར་དང༌། ཚོང་འགྲུལ། ཚྭ་ལེན། དབྱར་དགུན་གྱི་མཚེར་ས་སྤོ་འཇོག །ཁྲལ་རྒྱུག་འུ་ལག་སོགས་ཅི་དང་གང་དགོས་ཀྱི་སྐྱེལ་འདྲེན་རྣམས་སྐམ་སར་སྟབས་བདེའི་ངང་སྒྲུབ་ཐུབ་པ་དང༌། དེ་མིན་ཆུ་ཆུང་ལ་ཟམ་པ་དང་ཆུ་ཆེན་ལ་དབྱར་དུས་སུ་འདྲེང་དང༌། ཀོ་གྲུ །དགུན་ཁར་དར་ཐོག་བཅས་ནས་སྐྱེལ་འདྲེན་བྱེད་ཀྱི་ཡོད། སྡོད་གནས།ས་ཁུལ་འདིར་མཐོ་སར་འབྲོག་ཁུལ་དང༌། དམའ་སར་ཞིང་ཁུལ་ཡིན་པས་དེ་གཉིས་ལ་ཡུལ་འབྲོག་གཉིས་ཞེས་འབོད། ཞིང་གྲོང་ཁུལ་དུ་གྲོང་དང་གྲོང་གསེབ་ཏུ་སྡོད་གནས་ཁང་པ་ཡིན་པ་དང་འབྲོག་ཁུལ་གྱི་སྡོད་གནས་དགུན་དུས་སུ་ཕལ་ཆེར་ཁང་པ་དང༌། དབྱར་དཔྱིད་སྟོན་གྱི་དུས་ཚིགས་སོ་སོར་འཁོས་འབྱོར་ཆེ་ཆུང་བཞིན་སྦྲ་གུར་ཆེ་ཆུང་སྤྱི་རིགས་པ་ཡོད།