འབྲི་སྐལ་བཟང༌།
དུས་དེབ་སྔོན་མའི་ནང་དུ་ཕྲུ་གུ་སྐྱེ་འཕེལ་གྱི་བརྒྱུད་རིམ་དེ་བཤད་ཟིན་པ་ཡིན་པས་དེའི་འཕྲོ་མཐུད་པ་ལྟ་བུ་ཅུང་ཞིག་བཤད་པར་འདོད། དེ་ཡང་སྤྱིར་འགྲོ་བ་སེམས་ཅན་ཀུན་ལ་སོ་སོ་སྐྱེ་འཕེལ་བྱེད་སྟངས་དང་འཚོ་གནས་ཀྱི་བྱ་རིམ་རེ་ཡོད་ངེས་པ་ལོས་ཡིན། འདིར་ནི་འགྲོ་བ་མི་ཡི་དབང་དུ་བྱས་ནས་འཆད་ན་ཀློག་པ་པོ་རྣམས་ཀྱིས་གོ་བདེ་བ་དང་བསམ་བདེ་བ་ཞིག་ཡོང་བར་སྙམ་པས་དེ་ལྟར་འཆད་ན།
མི་རྣམས་ཀྱི་ལུས་ཀྱི་གནས་སྟངས་ནི་སྒྲིག་གཞི་དང་ལྡན་པ་ཞིག་ཡིན་ལ་ཡན་ལག་རྣམས་ཀྱིས་སྒྲིག་ཚུགས་དང་ལྡན་པའི་སྒོ་ནས་ལས་ཀ་བྱེད་ཀྱི་ཡོད། སྐབས་འགར་མཉམ་རུབ་ཀྱིས་ལས་ཀ་བྱེད་ཀྱི་ཡོད་ལ་སྐབས་འགར་ཆ་ཤས་གཅིག་ཙམ་གྱིས་ལས་ཀ་བྱེད་ཀྱི་ཡོད། ཡང་ཆ་ཤས་གཅིག་ཙམ་གྱིས་ལས་ཀ་བྱེད་ཟེར་དུས་ཆ་ཤས་གཞན་དང་འབྲེལ་བ་རྩ་བ་ཉིད་ནས་མེད་པ་ལ་ཟེར་གྱི་མེད།