ནོར་བུ་དོན་གྲུབ།
སྟོན་མཆོག་རྒྱལ་བ་རྣམས་དང་དེ་སྲས་ཀྱིས།།
རྣམ་གྲོལ་དོན་གཉེར་ཅན་ལ་ཟབ་རྒྱས་ཆོས།།
གསུངས་པའི་དོན་རྣམས་ཇི་བཞིན་སྟོན་མཛད་པའི།།
དངོས་བརྒྱུད་བླ་མ་རྣམས་ལ་གུས་པས་འདུད།།
མ་རྟོགས་ལོག་རྟོག་ཐེ་ཚོམ་གཞན་དབང་ཅན།།
བདག་ནི་གཞུང་དོན་འབྱེད་པའི་མཐུ་མེད་ཀྱང།།
ངལ་བ་བྱས་པའི་རྣམ་རྟོག་འཆར་བ་ཙམ།།
ཤོག་དཀར་ཡིག་ནག་རི་མོའི་གཟུགས་འགོད་བྱ།།
གཟུགས་གཟུགས་འཛིན་རྟོག་པའི་ཞེན་གཞི་ནི་གཟུགས་འཛིན་མིག་ཤེས་ལ་གཟུགས་དེ་ཕར་ཆད་པ་ལྟར་སྣང་བ་དེ་ཉིད་ཡིན་ལ། དེ་རྟོག་པ་ལ་འཆར་བའི་སྟོབས་ཀྱིས་རྟོག་པས་འདི་གཟུགས་སོ་སྙམ་དུ་ཞེན་ལ། དེ་འདྲ་བ་དེ་རྟོག་པར་སྣང་བ་ན་གཟུགས་རུང་ལ་གཟུགས་ཞེས་པའི་མིང་བརྡ་ལ་མ་བལྟོས་པར་གཟུགས་མཚན་ཉིད་པ་སྣང་ལ། དེར་སྣང་བ་ལྟར་གྲུབ་མ་གྲུབ་འཚོལ་བ་བཞི་དང་ཡོངས་ཤེས་བཞིའི་སྒོ་ནས་དཔྱད་པ་ན་གཟུགས་རུང་ལ་གཟུགས་ཞེས་པའི་མིང་བརྡ་ལ་མ་བལྟོས་པར་དངོས་དབང་སྟེ་དངོས་པོ་གཟུགས་ཀྱི་དབང་གིས་རྟོག་པའི་ཡུལ་དུ་སོང་བ་མ་ཡིན་པར་ངེས་པས་རྟོག་པ་ཡིད་ཤེས་ལ་བལྟོས་པའི་རྣམ་རིག་ཙམ་ལ་འཇུག་གོ །དེའི་ཚེ་གཟུགས་འཛིན་མིག་ཤེས་ལ་གཟུགས་ཕར་ཆད་པ་ལྟར་སྣང་བ་དེ་ཉིད་གཟུགས་མ་ཡིན་པར་གྲུབ་པས་དབང་ཤེས་འཁྲུལ་ཤེས་སུ་གྲུབ་བོ། །གཟུགས་སོགས་རྟོག་པའི་ཞེན་གཞི་ནི་གོང་དུ་བཤད་པ་ལྟར་འཇོག་དགོས་ཏེ། ལེགས་བཤད་སྙིང་པོ་ལས། སྔོ་འཛིན་ལ་སྔོན་པོ་ཕྱི་རོལ་ཏུ་ཞེན་པའི་ཞེན་གཞི་ཡིན་པ་སྣང་བའི་ཕྱིར་ཏེ། ཞེན་གཞི་ཡིན་པ་དེ་གཉིས་སྣང་ནུབ་པའི་རང་རིག་ལ་སོགས་པ་ལ་འཆར་དུ་མི་རུང་ཞིང། གཉིས་སྣང་ཅན་གྱི་སྔོ་འཛིན་ལ་སྣང་བ་མི་འགལ་བའི་ཕྱིར་རོ། །ཞེས་རྟོག་པའི་ཞེན་གཞི་དབང་ཤེས་ལ་སྣང་བ་ཡོད་ཅིང་རང་རིག་ལ་སྣང་བ་མེད་གསུངས་པས་ཁྱད་པར་འདི་ཉིད་ངེས་པར་འཛིན་དགོས་སོ། །