ནགས་ཤོད་སྐལ་རྒྱན།
དམ་པའི་ཆོས་མཛོད་གཞན་གྱིས་གནས་མིན་སྦས་དོན་ཡུམ་མདོས་ཉེར་སྦས་པ། །
མི་ཕམ་མགོན་པོས་ལེཌ་པར་གསལ་ཞེས་ལུང་བསྟན་དབུཌ་དབྱུང་བསྩལ་དང་ལྷན། །
ཉིད་ཀྱི་ཅོད་པཎ་དབུ་ལ་བསྒྲོན་ནས་རྒྱལ་ཚབ་དམ་པར་མངའ་གསོལ་བ། །
དགའ་ལྡན་ལྷ་ཡི་ལྷ་མཆོག་གྱུར་པ་མི་ཕམ་མགོན་ལ་གུས་ཕྱག་འཚལ། །
ཡུམ་དོན་གསལ་མཛད་ཤིང་རྟ་ཆེ་རྣམས་ཀྱིས། །
ཇི་ལྟར་བཀྲལ་དང་མདོ་རྒྱུད་ཚད་མའི་ལུང༌། །
མ་ལྷག་ཆད་པ་གསལ་བྱེད་ཚངས་པའི་ཐིག །མ་འཁྱོག་དྲང་པོའི་བློ་ཡིས་གདབ་པར་བྱ།
འཇིག་རྟེན་པ་ལ་ལྟོས་པའི་བདེན་རྫུན་སྒྱུ་མའི་དཔེས་བསྟན་པའི་སྐབས་སུ་དོགས་པ་བཅད་པ།།
དེ་ལྟར་སྒྱུ་མའི་རྟ་གླང་དུ་སྣང་བ་རྣལ་འབྱོར་སྤྱོད་པའི་དབུ་མ་པ་ལྟར་ན་རང་རིག་མངོན་སུམ་དང་ཕྱི་རོལ་ཁས་ལེན་པའི་རང་རྒྱུད་པ་ལྟར་ན་ས་ཕྱོགས་སམ་བར་སྣང་ལྟ་བུའི་གཞི་འཛིན་པའི་དབང་པོ་མངོན་སུམ་གྱིས་འགྲུབ་ལ་ཞེས་སོགས་ཀྱི་སྐབས་སུ་སྒྱུ་མའི་རྟ་གླང་སྣང་བ་ལྟར་དུ་མེད་ཏེ་དེ་ལྟར་ཡོད་ན་མིག་མ་བསླད་པའི་གང་ཟག་དེ་དག་གིས་མཐོང་དགོས་པ་ལས་མ་མཐོང་བའི་ཕྱིར་ཞེས་པའི་རིགས་པ་ལ་བརྟེན་ནས་དེ་སྣང་བ་ལྟར་དུ་གྲུབ་པ་ཁེགས་ལ་དེ་སྣང་བ་ལྟར་མ་གྲུབ་པ་རྟོགས་པའི་བློ་ནི་རིགས་ཤེས་ཕྲ་རགས་གང་རུང་མ་ཡིན་ཏེ་དེ་ཡིན་པ་ལ་གཞི་དེ་ཐ་སྙད་པའི་བློ་རང་དགའ་བའི་དབང་དུ་བྱས་པའི་བདེན་གྲུབ་ཡིན་དགོས་པས་དེ་ལ་ཡང་དེར་སྣང་བྱུང་ན་དེས་སྟོང་མི་འོང་བ་དང་དེས་སྟོང་བྱུང་ན་དེར་སྣང་མི་འོང་བ་དང་གཉིས་ཡོད།