ལས་སྨོན་སྐལ་པ་བཟང་པོའི་ལྡིང་ཁང་དུ། །
ཐོས་བསམ་སྒོམ་པའི་སྤྲིན་རིམ་ལ་ཆགས་པ། །
ལུང་རིགས་སྤྲིན་གྱི་མེ་ཏོག་རྟག་བཞད་པའི། །
ཆོས་གྲོགས་དབྱར་གྱི་དཔལ་མོ་གཙུག་གིས་མཆོད། །
གཞུང་རྒྱ་སྨྲ་བའི་མགྲིན་གླུ་སྙན་སྒྲོག་བཞིན། །
མདོ་སྔགས་རིགས་པའི་ནགས་ཀླུང་ལ་རྒྱུ་བ། །
འཛམ་གླིང་ཞི་བདེར་འབོད་པའི་ཕོ་ཉ་ཁྱུ། །
ཐུབ་བསྟན་ལང་ཚོ་གསར་པའི་རྒྱན་ཞིག་ཡིན། །
རྡོ་རྗེ་གདན་དུ་འདུལ་བསྟན་འཛིན་པའི་སྡེ།
སྔོན་མེད་ལས་གཞི་གསེར་གྱི་མཆོད་སྡོང་ཆེ། །
དབུ་འབྱེད་སྣང་བས་ས་ཆེན་ཁྱབ་བྱེད་པ། །
ཐུབ་དབང་དགྱེས་པའི་མཆོད་སྤྲིན་རྒྱ་མཚོ་ཡིན། །
ཡེ་ཤེས་དག་སྣང་གཟིགས་པ་ཆེན་པོའི་ཀློང་། །
ཐུབ་ཆེན་གསེར་གྱི་ཉི་མའི་དཀྱིལ་འཁོར་འཛུམ། །
དགྱེས་བརྩེས་ཅཱོཀ་ལེར་གནང་བའི་ངོ་མཚར་གཏམ། །
ཚངས་དབྱངས་སྙན་པ་རྣ་བའི་བདུད་རྩི་ཡིན། །
གསང་གསུམ་མཛད་པ་འབྱམས་སུ་བཀླས་པ་རྣམས། །
སྐྱེ་བོ་ཕལ་གྱིས་སྤྱོད་པའི་གནས་མིན་ཡང་། །
ཡང་དག་གཟིགས་པའི་སྣང་བ་འདི་འདྲ་ཞེས། །
དབུཊ་དབྱུང་ཐོག་མའི་སྐལ་བཟང་འདི་ཀོ་རྨད། །
ཐུབ་ཆེན་གངས་ཀྱི་རི་བོ་ལས་འོང་པ། །
སྣ་ཚོགས་སྡེ་པ་སོ་སོའི་ཆུ་ཕྲན་རྣམས། །
ངེས་དོན་རྒྱ་མཚོ་གཅིག་ཏུ་འབབ་བྱེད་པ། །
ཡང་དག་བགྲོ་གླེང་དང་པོ་འབྲས་སྤུངས་འཚོགས། །
ཤེས་བྱ་རིག་པའི་གསེར་གྱི་འཁྲི་ཤིང་རྩེར། །
མཛེས་ལྡན་འོད་ལྔའི་ལང་ཚོ་རབ་རྒྱས་པ། །
སྣ་ཚོགས་འབྲས་བུའི་ཁུར་གྱིས་མཛེས་པ་ཡི། །
ཡལ་འདབ་བརྒྱ་པ་སིང་ག་གླིང་ན་གྲོལ། །
གཞི་གསུམ་གསེར་གྱི་ས་གཞི་མཛེས་པའི་སྟེང་། །
བསླབ་གསུམ་ཉམས་བཞེས་ཚལ་གྱིས་གང་བ་ཡི། །
མདོ་སྔགས་རིག་པའི་ཚལ་ཆེན་ལ་དགའ་བའི། །
ལུང་རིགས་གཤོག་ཟུང་ཡངས་པོ་ཐེ་ལན་བརྐྱངས། །
སིང་ག་གླིང་དང་ཐེ་ལེན་ཡུལ་གྲུ་ཀུན། །
རི་ལུང་ཐང་གསུང་རྟེན་གསུམ་གྱིས་མཛེས་པ། །
གནས་ས་རི་ཁྲོད་བྱིན་ཆེན་ཆགས་པའི་ཡུལ། །
འགྲུལ་བཞུད་སྐལ་བཟང་འདི་ཀོ་ཨེ་མ་རྨད། །
སྔོན་བྱོན་སྟོན་ཆེན་མཆོག་གི་ཞབས་རྗེས་དང་། །
ཉིད་ཀྱི་དབུ་སྐྲ་འབྲེག་བྱེད་རལ་གྲི་དང་། །
རིང་བསྲེལ་རྣམ་བཞིས་གཏམས་པའི་མཆོད་རྟེན་སོཊ། །
རྟེན་གསུམ་ཚར་དུ་དངར་བའི་བྱིན་ཆེན་ཐོབ། །
དམར་སེར་ལི་ཁྲིའི་མཚོ་ཆེན་འཕྱུར་འདྲ་བ། །
པཱ་ལིའི་ཆོས་རྒྱུད་འཛིན་པའི་གནས་བརྟན་སྡེ། །
ཞི་དུལ་འདུལ་བའི་ཕྱག་ལེན་རབ་གཙང་བ། །
འདུལ་བསྟན་དྲི་མེད་སྐྱོང་བའི་རྣམ་ཐར་མཛེས། །
དུས་རབས་ཉེར་གཅིག་ནད་མུག་འཁྲུག་རྩོད་སོགས། །
ཞི་བྱེད་སྨན་ཆེན་ཞི་བསིལ་དམ་པའི་ཆོས། །
འདུལ་བསྟན་འདི་ཉིད་ཡིན་ཞེས་མཁས་ཀུན་གྱིས། །
དཔྱད་གསུམ་དག་པའི་གཏན་ཚིགས་ཡང་ཡང་བཀོད། །
དེ་ཕྱིར་ཐུབ་བསྟན་འཛིན་སྐྱོང་སྤེལ་གསུམ་གྱི། །
ལམ་སྟོན་རིན་ཆེན་གསེར་ལས་ལྷག་པའི་དཔེ། །
གོང་ས་མཆོག་གི་བཀའ་ལུང་སྤྱི་གཙུག་གི། །
མཛེས་རྒྱན་ཁོ་ན་ཡིན་ཞེས་མཁས་རྣམས་བསྟོད། །
ཐེག་པ་ཆེ་ཆུང་མཐུན་པའི་ལམ་ཡངས་སུ། །
ཞུགས་ནས་འགྲོ་ཀུན་ཞི་བདེའི་རྒྱ་མཚོ་ཆེར། །
རྫོགས་ལྡན་གསར་པའི་དགའ་སྟོན་ལ་རོལ་ཕྱིར། །
ཐུབ་བསྟན་འཛིན་སྐྱོང་སྤེལ་གསུམ་གལ་ཆེན་གསུངས་། །
དེ་ལྟར་མཇུག་གི་བཀྲ་ཤིས་དགེ་བའི་དཔལ། །
པོ་ཏཱ་ལ་ཡི་གཟི་བྱིན་འཕོས་འདྲ་བ། །
དྷོ་ལ་དྷ་རིའི་ཕང་པར་རབ་མཛེས་པ། །
རྒྱལ་བའི་ཕོ་བྲང་ཡིད་འོང་དགའ་ཚལ་དུ། །
བརྩེ་ཆེན་ཐུགས་རྗེའི་གཟིགས་པ་མི་ལྷོད་པར། །
གསུང་གིས་དབུཊ་དབྱུངས་སྩལ་བའི་སྐལ་བཟང་འདི། །
སྟོང་གསུམ་ནོར་ཀྱི་བླུས་ཀྱང་ཁུག་པ་མིན། །
ཨེ་མ་སྔོན་བསགས་བསོད་ནམས་ཆེ་འོ་སྙམ། །
ཐོག་མའི་དབུ་འབྱེད་ཐ་མའི་མཇུག་སྡོམ་བར། །
ལས་གཞི་འདི་ཡི་འགོ་མཇུག་བར་གསུམ་གྱི། །
ཕྱི་ནང་གསང་གསུམ་མཛད་འཕྲིན་ཡོད་དོ་ཅོག །
མགོན་པོ་མཆོག་གི་ཐུགས་རྗེའི་རོལ་གར་ཡིན། །
ཤེས་རིག་ནོར་བུའི་ཚོགས་ཀྱིས་གང་བ་ཡི། །
ཆོས་གྲོགས་ཀླུ་དབང་གཙུག་ན་རིན་ཆེན་བདག །
བཤད་སྒྲུབ་དཔལ་གྱི་ལོངས་སྤྱོད་རབ་རྒྱས་ཀྱང་། །
འདོད་ཆེན་སྒྲ་ཀུན་བཞིལ་བའི་རྣམ་ཐར་མཛེས། །
མདོར་ན་ས་གསུམ་རྣམ་པར་དཀར་བའི་དགེ། །
དགེ་ཚོགས་གངས་རིའི་མདངས་འཛིན་ཇི་སྙེད་ཀུན། །
ཀུན་ཀྱང་བསྟན་པ་རིན་ཆེན་འཛིན་པའི་མགོན། །
མགོན་པོའི་བཞེད་དགོངས་ཡང་དག་འགྲུབ་ཕྱིར་བསྔོ། །
བགྲོ་གླེང་ཞུགས་པའི་སྙིང་པོ་མདོར་བསྡུས་པ། །
གོ་བདེར་ཚིགས་བཅད་ཉི་ཤུའི་བདག་ཉིད་འདི། །
རྗེས་དྲན་སེམས་ཀྱི་འཆར་སྒོ་མི་ནུབ་ཆེད། །
ནགས་ཤོད་སྐལ་རྒྱན་བྱ་བས་ཤར་མར་སྤེལ། །
ཞེས་པ་ཚིག་བཅད་ཉི་ཤུའི་བདག་ཉིད་འདི་པཱ་ལི་དང་ལེགས་སྦྱར་པའི་དགེ་འདུན་དབར་གྱི་ཤེས་ཡོན་བརྗེ་ལེན་གྱི་ལས་གཞི་དང་འབྲེལ་བའི་དབུ་འབྱེད་མཛད་སྒོར་རྡོ་རྗེ་གདན་དུ་འཚོགས་པ་དང་དེ་རྗེས་གདན་ས་ཆེན་པོ་འབྲས་སྤུངས་དང་། སིང་ག་གླིང་། ཐེ་ལེན་བཅས་རྒྱལ་ཁབ་གསུམ་ནང་བགྲོ་གླེང་མཉམ་ཞུགས་བྱས་པའི་མཐོང་ཐོས་མྱོང་གསུམ་སྐོར་ཅུང་ཙམ་བཀོད་པ་འདི་ནགས་ཤོད་སྐལ་རྒྱན་པས ༢༠༢༣.༩.༢ ཉིན་སྦྱར་བའོ། །