རྩོམ་བརྡ་གསལ་བསྒྲགས།

དྲི་མེད་ལྷག་བསམ་དཀར་པོའི་བ་དན་ཕྱོགས་ཀུན་གཡོ་ཞིང་ཕུལ་བྱུང་རྣམ་དཔྱོད་ཀྱི་བློ་གྲོས་རབ་ཏུ་རྒྱས་པའི་རང་རིགས་རྩོམ་པ་པོ་རྣམས་ཀྱི་སྙན་ལམ་དུ།

ཆེད་ཞུ།

ང་ཚོ་ཁ་བ་གངས་ཅན་པའི་རིག་གཞུང་རྣམས་ཉམས་པ་སླར་གསོ་དང་མི་ཉམས་རྒྱུན་འཛིན། གནས་པ་གོང་འཕེལ་དུ་འགྲོ་བའི་ཆ་རྐྱེན་ནམ་གཞི་རྩ་གཙོ་བོ་ནི་བོད་ཡིག་འདི་ཡར་རྒྱས་གཏོང་ཐུབ་མིན་ལ་རག་ལས་ཡོད་པའི་ཚུལ་ནི་གསལ་བཤད་ག་ལ་དགོས། དེར་བརྟེན་ང་ཚོ་བོད་མི་ཡོངས་ཀྱིས་འདི་ཉིད་ལ་གཅེས་འཛིན་དང་མཐོང་ཆེན་ངེས་པར་བྱ་དགོས་པ་ཡིན། དེ་ཡང་འཕགས་མཆོག་འཇིག་རྟེན་མགོན་པོའི་དགོངས་གཞི་དང་བཀའ་འབྲེལ་གཉིས་ཐད་ནས་བོད་ཀྱི་རིག་གཞུང་འདི་ཉིད་ཡར་རྒྱས་གཏོང་བ་ལ་བོད་པ་མི་རེ་ངོ་རེས་འགན་འཁུར་དགོས་པའི་བཀའ་སློབ་རབ་དང་རིམ་པ་རང་ཅག་རྣམས་ཀྱི་སྤྱི་བོའི་རྒྱན་དུ་ཕེབས་ཡོད། དེ་བཞིན་ཚོགས་པ་དང་ལུང་ཚན་སོ་སོས་ཀྱང་གང་ནུས་དེ་སྒྲུབ་ཀྱི་ཚུལ་དུ་གངས་ཅན་པའི་རིག་གཞུང་འཛིན་སྐྱོང་བྱེད་དགོས་པ་སྐབས་སུ་བབས་པ་ཞིག་ལོས་ཡིན། རྒྱུ་མཚན་དེ་དག་ལ་གཞིགས་ནས་མདོ་ཁམས་ནགས་ཤོད་འབྲི་རུ་བ་རྣམས་ཀྱིས་རང་འགན་རང་ཁུར་གྱི་ཚུལ་དུ་བོད་ཡིག་གཙོ་བོར་གྱུར་བའི་བོད་ཀྱི་རིག་གཞུང་རྣམས་འཛིན་སྐྱོང་དང་ཡར་རྒྱས་ལ་དམིགས་ནས་སྤྱི་ལོ་ ༢༠༠༩ ལོར་ནགས་ལྷ་རྩོམ་སྒྲིག་ཁང་གསར་དུ་བཙུགས་པ་དང་། དཔྱད་རྩོམ་དང་སྒྲུང་རྩོམ། ནང་ཆོས་དང་ཚན་རིག །ལོ་རྒྱུས་དང་ཆོས་འབྱུང་སོགས་མདོར་ན་གནའ་དེང་གི་ཤེས་བྱའི་གནས་ལ་འགྲེལ་བརྗོད་ཐུབ་པའི་རྩོམ་ཡིག་སྣ་མང་ལས་གྲུབ་པའི་དུས་དེབ།

༼ནགས་ལྷའི་སྒྲོན་མེ་༽ཞེས་པ་འདོན་ཐེངས་ལྔ་ལེགས་གྲུབ་བྱུང་ཡོད། དེ་བཞིན་༼ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་༽ ཅེས་པ་རྩོམ་ཡིག་གི་ལམ་ནས་གོ་རྟོགས་སྤེལ་ཐབས་དང་། གཞན་ཡང་གཞུང་ཁྲིད་དང་ལམ་སྟོན་བསླབ་བྱ། རིག་གནས་འཆད་ཁྲིད་སོགས་སྒྲ་འཇུག་བྱས་ནས་བོད་ཕྱི་ནང་གང་ས་ནས་ལྟ་ཉན་ཐུབ་པའི་དྲ་རྒྱ་ཞིག་ཀྱང་གཉེར་བཞིན་པ་ཡིན། དེའི་ཐད་བོད་ཕྱི་ནང་གཉིས་ཀ་ནས་ལེགས་གསོལ་བསྔགས་བརྗོད་གནང་བའི་མཁས་པ་དང་དོན་གཉེར་ཅན་མང་པོ་བྱུང་དང་འབྱུང་བཞིན་ཡོད། དེ་བཞིན་སྙན་རྩོམ་འགྲན་བསྡུར་དང་བརྡ་སྤྲོད་རིག་པའི་བགྲོ་གླེང་གོ་སྒྲིག་ཞུས་པ་སོགས་རིག་གཞུང་ལ་ཕན་པའི་ལས་རིམ་དུ་མ་ལ་འབད་བཞིན་པ་ཡིན། ང་ཚོའི་དམིགས་ཡུལ་དང་རེ་བ་བཞིན་རྩོམ་པ་པོའི་གྲངས་ཚད་དང་། རྩོམ་ཡིག་གི་སྤུས་ཚད་སོགས་གང་ཐད་ནས་ཡར་རྒྱས་ཧ་ཅང་ཆེན་པོ་བྱུང་ཡོད་པའི་ཚུལ་ལ་གྲགས་ཅན་གྱི་རྩོམ་པ་པོ་མང་པོ་ཞིག་གིས་བསྔགས་བརྗོད་ཐོབ་ཡོད། ལས་རིམ་རྣམས་དེ་ལྟར་ལེགས་གྲུབ་བྱུང་བའི་རྒྱུ་རྐྱེན་གཙོ་བོ་ནི་རྒྱ་ཆེའི་རྩོམ་པ་པོ་རྣམས་དང་། དངོས་ཤུགས་བརྒྱུད་གསུམ་ནས་དཔལ་འབྱོར་དང་ལས་ཀའི་ཐད་ལྷག་བསམ་རྣམ་དག་གིས་རྒྱབ་སྐྱོར་གནང་མཁན་རྣམས་ཡིན་པས་ལས་རིམ་འདིའི་ཐོག་མཉམ་ཞུགས་གནང་མཁན་ཚང་མ་ལ་སྙིང་ཐག་པ་ནས་ཐུགས་རྗེ་ཆེ་ཞུ། དུས་དེབ་འདོན་ཐེངས་དྲུག་པ་འདི་ལོའི་ལམ་རིམ་གསུང་ཆོས་ཀྱི་སྔོན་དུ་བསྒྲིག་འཆར་ཡོད་པས་རྩོམ་པ་པོ་རྣམས་ཀྱིས་རྩོམ་ཡིག་གི་བརྗོད་གཞི་སྔར་རྒྱུན་བཞིན་དང་། དུས་དེབ་ཀྱི་ཤོག་ངོས་ལྔ་ལས་མ་བརྒལ་བ་བཅས་སྤྱི་ལོ་ ༢༠༡༤ སྤྱི་ཟླ་ ༡༠ ཚེས་ ༡༥ ནང་ཚུད་འདི་ག་རྩོམ་སྒྲིག་ཁང་ལ་འབྱོར་ཐུབ་པ་གནང་རོགས་ཞུ། གཞན་ཡང་ང་ཚོའི་དྲ་རྒྱའི་ནང་ལ་འཇུག་རྒྱུའི་རྩོམ་ཡིག་དང་། ཕ་ཡུལ་གྱི་རི་དང་ལུང་པའི་པར་རིས་གསར་པ། གནས་ས་རི་ཁྲོད་སོགས་ཀྱི་པར་དང་ལོ་རྒྱུས། གཞུང་ཁྲིད་དང་བསླབ་བྱ། རིག་གནས་ཀྱི་སྐོར་འཆད་ཁྲིད་ཀྱི་སྒྲ་འཇུག་སོགས་རང་གཞན་ལ་ཕན་པའི་རིགས་ཡོད་ན་དུས་ངེས་མེད་ནགས་ལྷ་རྩོམ་སྒྲིག་ཁང་ལ་འབྲེལ་བ་གནང་རོགས་ཞུ། 
སྤྱི་ལོ་ 2014 ཟླ་བ་ 7 ཚེས་ 4 ཉིན་སྤེལ། 

ནགས་ལྷ་རྩོམ་སྒྲིག་ཁང་།

འབྲེལ་གཏུག་གློག་འཕྲིན་ཁ་བྱང་། ནགས་ལྷ་རྩོམ་སྒྲིག་ཁང་། This email address is being protected from spambots. You need JavaScript enabled to view it.

འབྲི་སྐལ་བཟང་། This email address is being protected from spambots. You need JavaScript enabled to view it.

དཀོན་མཆོག་སྐྱབས། This email address is being protected from spambots. You need JavaScript enabled to view it.

ཁ་པར་ཨང་། འབྲི་སྐལ་བཟང་། 0091-9882675550

དཀོན་མཆོག་སྐྱབས། 0091-9805627529

འཕྲིན་ཕྲན་ཁ་བྱང་། འབྲི་སྐལ་བཟང་། 1730150857

དཀོན་མཆོག་སྐྱབས།